肥賓一出襯家現形

猪拉多纳

一個人有幾多料、有冇power，自己講冇用，最好聽聽身邊敵人言論，自然能夠準確定位。大多數選美活動的友誼小姐，當選只因並冇殺傷性。如果你的存在，足以搞到我雞犬不寧、飯碗不保，我推你落山都嚟唔切啦，友誼？朋友？唔該留番拜山先講。

迪馬堤奧被阿布踢落車，賓尼迪斯踎躉兩年終於有工開，同業們紛紛出言贈慶。莫連奴率先發難，寸「肥賓」上車應帶埋馬達拉斯，時刻提醒大家自己醒啲；費格遜亦加埋把口，話「肥賓」好運又有機會攞世界冠軍球會盃，可謂口賤格衰，幾十歲人都唔知咩叫風度。
唔忌你點會踩你

點解賓尼迪斯會引得兩位名帥開金口呢？只因有的是實力。紅軍曾於歐聯多次戰勝車路士，叫莫帥焦頭爛額；亦嘗過於08至09年間三殺曼聯，令老費面紅氣喘。話「寸莫」、老費驚「肥賓」，可能言重了，但起碼證明賓尼迪斯有能力當攔路虎、有力興波作浪、有力令到班名帥搵窿捐，絕非坊間阿豬阿狗所言，只係「西班牙肥waiter」咁簡單。

人愈成功，敵人就會愈多。就算你屬和平主義者，對頭人也會自動自覺找上門，就等於黃飛鴻辦寶芝林，本身只想睇睇症、教吓細路強身健體，但石堅總會唔識死，跑來踢館一樣。如果就業多年，身邊都冇一個半個對頭人向你亮明刀、發暗箭，唔係你人緣好，只因你並非大樹。枝幼幹弱，又何德何能來招風？