畢爾包蓄銳炸拉科

猪拉多纳

洛蘭迪破冰大解放

今季起伏不定嘅畢爾包，現時只比降班區球隊多四分，難得今晚主場迎戰後防立立亂嘅拉科魯尼亞，畀到失寵箭頭洛蘭迪發圍機會，加埋上周中歐霸盃因以巴戰火唔使踢，「巴斯克雄獅」養精蓄銳下，誓必向作客嘅拉科狂轟猛炸，大盤可以放心捧場。

（now 632周一凌晨零時直播）

由於以巴戰火關係，基於安全理由，令畢爾包上周中歐霸盃作客以色列對基爾史莫納夏普爾之役延期，唔使舟車勞頓，變相令畢軍球員有成個禮拜休整期，球員可以叉足電迎戰拉科。儘管弗爆射手阿度里斯需要服刑停賽，主帥比爾沙被迫復用同佢唔咬弦嘅箭頭洛蘭迪，但以後者嘅質素及搶韁意欲，仲唔趁機會喺比帥面前入多幾粒威番鋪咩，加埋老拍檔蒙尼恩及馬高蘇沙亞達兩翼支援，畢爾包攻力毋庸置疑。
拉科防線慌失失

另一邊廂，拉科最大問題係逢作客被打破缺口便進退失據，成班守將踢到失晒魂，促使防線迅速崩潰，之前被薩拉戈薩反勝5比3就係最佳例子。禍不單行，今仗拉科仲有門神艾蘭蘇比亞、後防薛卡斯度等因傷停缺陣，勢必被急於搶分嘅「巴斯克雄獅」予取予攜，呢場首選大盤，亦可吼埋「讓球主勝」。