中國女足頂唔住袋鼠妹

猪拉多纳

「凋謝玫瑰」冇人接班

2013年女子東亞盃第2圈外圍賽今日上演終極戰，中國女足喺深圳市體育場對澳洲女足，為爭出線非勝不可，弊在昔日「鏗鏘玫瑰」已經凋謝，主力馬曉旭更不甘被批評同傳媒開火，士氣好極有限，「袋鼠妹」澳洲女足「讓球客勝」抵撐！

（now633及660台周六下午3:45直播）
馬曉旭自爆得7成狀態

兩隊同樣兩戰全勝，但中國女足日前對中華台北贏得兩粒，搞到得失球差唔及澳洲，要出線今場一定要贏。假如大家有睇佢哋頭場以6:0炒起香港女足嘅直播，應該同意「黑珍珠」韓端上年結束國際賽生涯後，「鏗鏘玫瑰」其實冇人接到班，今屆仲要重召闊別國家隊4年嘅浦瑋救亡，大炒香港只不過因對手太弱，近年長期受傷患折磨嘅馬曉旭又未操起，自爆對香港嗰陣只得7成狀態，最近更加就獨食言論同傳媒發炮，佢話：「不獨就不是好前鋒！」

同時，馬曉旭又批評深圳市體育場連菜地都不如，暗示場地影響佢發揮，躁底好難踢好波。對家澳洲女足就唔同，兩場分組賽入11球、零失球順到冇人有，而且教頭施曼利尼帶埋呢場，就會轉任美國女足主帥，當然希望拎到東亞盃決賽周入場券完美告別啦，信佢就要捧場！