廣島入球騷迎巨額贊助

猪拉多纳

想激勵士氣，有乜直接得過用真金白銀吖！日職廣島三箭正在向聯賽冠軍衝刺，今日佢哋响主場迎戰大阪櫻花之前，收到一份為期三年嘅商業贊助，金額接近1億日圓（約港幣1千萬元），成隊人興奮過飲大咗，呢場波個1.62倍入球大走唔甩。

（now633、660、711台及有線148周六下午1:30直播）

目前以1分壓住仙台維加泰帶頭嘅廣島三箭，今場波贏唔到櫻花嘅話，九成九會畀仙台爬頭，所以毋須擔心佢哋唔搏。事實上，廣島當地企業、球迷都全力支持三箭，希望佢哋可以攞到球會歷史上第一個聯賽冠軍，除咗今日會有34,450個Fans買飛入場打氣，破咗球會18年嚟嘅入座紀錄，有間家電量販店仲以每年3,300萬日圓，買咗廣島個主場冠名權3年，送咗將近成億日圓畀佢哋。
櫻花未上岸唔會放軟手腳

人又有、錢又有，廣島三箭今仗戰意肯定勁。對家櫻花亦面對降班威脅，起碼都要求1分，搶到3分直情上岸添，同樣唔會放軟手腳，今場肯定唔會係場攻防戰而係對攻搏拳。由於大家都要搏，又陣容不整：三箭有中場米傑治、後衞千葉和彥停賽；櫻花前鋒播戶龍二亦坐波監，硬碰硬開個入球大一啲都唔難。何況三箭响主場10戰櫻花，開咗8大2細，如果用3.5球做中位數計，都開咗6大4細，今場博佢開大好正路。