紅魔收QPR大禮

猪拉多纳

費Sir銅像揭幕 曉士被炒贈興

英超二哥曼聯今晚喺主場迎擊榜尾弱旅昆士柏流浪（QPR），QPR上季累曼聯失冠，紅魔教頭費格遜記得清清楚楚，QPR賽前怒炒主帥曉士，老費未能親手送曉士最後一程，但佢唔會就此罷休，加上爵爺銅像尋日正式揭幕，誓於奧脫福主場大炒QPR賀吓佢，大細中位數調高至3.5球，照捧大盤！

（有線300及200台周六晚11時直播）

曉士上季帶領QPR喺煞科日惡戰曼城，若然唔輸就可以幫曼聯完成奪冠大業，不過老費如意算盤打唔響，皆因QPR知道自己護級成功後即時放軟手腳，最終全失三分，搞到紅魔失冠收場，老費嬲到出煙，賽後痛斥QPR幫唔到手，當正曉士係仇人，QPR上上下下全部得罪晒佢老人家。
上輪滑鐵盧誓反彈

費爵爺今夏放朴智星去QPR，再借埋法比奧達施華畀佢哋，睇落好似冇嬲，查實星仔已經老退，法比奧發展停滯不前，兩單轉會出於商業考慮，唔好諗得太多！QPR開季聯賽十二戰不勝得四分，曉士最終喺今場賽前被炒魷，佢哋除去費Sir眼中釘，但唔代表已經「贖罪」，老費點都要報呢個仇！

撇開所有恩恩怨怨，紅魔上周聯賽爆冷輸畀諾域治，返主場決心爭取反彈，佢哋晨早喺歐聯晉級，周中作客加拉塔沙雷收起大批主力hea踢，輸都冇壞，尹佩斯及朗尼等射手抖足精神，今戰可以齊齊落場搏殺，將會盡情喪攻QPR！客軍中堅麥比亞停賽期滿可候命，但班波三線人腳唔及對手，後防尤其唔掂，上次主場對修咸頓都失三球，頂唔住紅魔鬼，今場大敗機會極高。