奧沙辛拿復「蘇」繼續追

猪拉多纳

今晚西甲獨腳戲上演皇家蘇斯達主場對奧沙辛拿，雖然話皇蘇2連勝氣勢如虹，甚至有力爭取歐洲賽席位，但查實奧沙辛拿爛船都有三斤釘，狀態逐漸回勇，加上皇蘇中場貝加拉因傷上陣成疑，影響唔小，主隊讓波，不如博1.9倍「讓球客勝」啦！

（now632台周六凌晨4:30直播）
皇蘇中場核心貝加拉打柴

皇蘇近排連贏馬拉加同華歷簡奴，其中上仗大炒華歷簡奴4蛋仲要係近7場以來首次冇失波，狀態持續冒升，當然令捧場客憧憬。事實上，佢哋歷來主場36戰迎戰奧沙辛拿，就錄得24勝6和6負，表面睇的確佔盡優勢，不過咪話力奇潑佢哋冷水，佢哋正選中場貝加拉上仗勇戰大腿受傷，今仗唔踢得，就算有基沙文同蘇魯圖沙齊齊復出，都未必填補到佢助攻助守連繫全隊嘅作用。

奧沙辛拿呢邊，目前排尾二無疑令人失望，但其實佢哋上季能夠喺西甲攞第7，今夏人腳變動又未至太大，照計點都冇理由走樣得咁誇張。佢哋近期狀態都終於見到回升，作客砌低完愛斯賓奴，上輪又喺主場守和馬拉加。主帥文迪利巴見之前兩周喺周中安排一課閉門操練後，即刻可以成功搶分，今周都有照辦煮碗，爭分決心極大，始終實力唔太差，今鋪博佢哋保住唔輸，唔算太貪心吖！