漢堡冇優「細」

猪拉多纳

孫弘民扭計 炒唔起杜塞爾多夫

德甲老牌球隊漢堡今晚作客杜塞爾多夫，漢堡近排啞晒火之餘仲好運滯，先係台柱孫弘民「跳草裙舞」唔肯續約，再有主場恩達球場內一個極有象徵意義嘅「德甲鐘」壞咗整唔番，咁黑仔，造訪守強攻弱嘅杜軍入波唔慌多，捧1.74倍入球細好過！

（有線64及204、廣東體育周六凌晨3:30直播）
漢堡「德甲歷史鐘」打柴

就咁睇漢堡近期只係輸過畀實力較強嘅拜仁同史特加，好似OK咁，但睇真啲，佢哋其實近6場有一半賽事冇波入，僅得嘅4球進帳中有3球係由孫弘民包辦。呢位20歲嘅南韓射手頻頻「單天保至尊」為漢堡搶分，又喺上場對緬恩斯攻入奠勝球，搞到阿仙奴同利物浦都有意搶人，漢堡梗係想快快手手同呢位2014年約滿嘅救世主續約啦！點知孫弘民日前向德國《圖片報》自爆想離隊：「我續唔續約？真係好難講o架！」佢唔入波就冇人識入，家陣仲話可能閃人，陣內氣氛又點會好？
杜塞爾多夫主場7戰入得3粒

漢堡係德甲成立後，唯一未降過班嘅頂級聯賽球隊，佢哋更喺主場恩達球場內整咗個計算球隊喺德甲49年歲月嘅跳字鐘，但呢個有近半世紀歷史嘅鐘近日打柴，想整都整唔番，實在相當可惜，班球迷同球員當然冇癮啦！

對家杜塞爾多夫今季升班後主場未贏過，7戰入得3球咁大把，但佢哋早排接連畀拜仁同禾夫斯堡大炒後，防線已經大有改善，啞火嘅漢堡唔係咁易咬得入佢哋，咁搞法，呢場波都唔使旨意多波入喇。