三神掃葉爭上日職

猪拉多纳

今午東京國立競技場上演日乙升班附加賽終極一戰，由大分三神同千葉市原爭最後一席日職位置，三神射手森島康仁上場包辦四個士哥，喺關鍵時刻大爆發踢出身價波，重現大阪櫻花優質青訓產品本色，乘勇可助球隊升班，要「讓球主勝」！

（周五中午12時開賽）
森島康仁弗爆領軍

森島康仁出自大阪櫻花青年軍，○七年代表日本出戰世青盃，隊員包括香川真司、夏雲拿、內田篤人及槙野智章等人，當年森島被視為國家隊新希望，但往後發展麻麻，睇住同期戰友出國搵食大放異彩，自己就喺日乙浮沉，佢都好唔忿氣。大分三神爭緊升班，「肥仔嘜」森島康仁終於嚟料，季尾連場射入關鍵士哥，上場對京都不死鳥葉問上身一個打晒，食出「大四喜」，非常叻仔！

千葉市原季尾都好弗，對上四戰全勝兼保持不失，但佢哋今次對住弗到震嘅森島康仁，防線將會面對極大壓力，睇怕難再保住清白之身。兩隊今季聯賽兩次交手各贏一場，大家級數差距唔大，五五波市原讓唔起對手，一於要「讓球主勝」！賽制方面，雙方九十分鐘打和要加時，加時再和就射十二碼分勝負。