漢堡穩中求勝封蝕本門

猪拉多纳

杜塞爾多夫殘陣態沉

德甲獨腳戲杜塞爾多夫主場對漢堡，杜塞爾多夫近期狀態每況愈下，已經成為降班膽，面對近況冒升兼穩中求勝嘅漢堡應處下風，平手盤黑柴撐客軍漢堡。

（有線64及204台周六凌晨3時30分直播）
主隊3線領袖齊缺陣

新升班嘅杜塞爾多夫季初曾保持6輪不敗，其中頭5輪更一球不失，一度成為「神奇球隊」，可惜好快就打回原形，近7場聯賽2和5負未贏過，喺積分榜已急跌至尾3，球隊3線領袖包括後防大將馬尼沙斯、經驗豐富嘅中場奧利華芬克同首席射手舒查軒都因傷缺陣，舒查軒倦勤固然令球隊攻力大為削弱，不過致命傷都係冇咗馬尼沙斯，呢位希臘守將係球隊季初神奇嘅主因，頭7輪聯賽喺佢領導下，杜塞爾多夫合共僅失3球，可惜佢受重傷要長抖，球隊防線立即崩潰，繼後5輪聯賽合共竟然狂失15球。杜塞爾多夫上輪作客以1比2僅負於雲達不來梅，不過球賽水準甚低，喺黑柴眼中不來梅根本踢到不知所謂，但杜塞爾多夫喺人多打人少下竟然畀對手反勝，實在相當水皮，今晚繼續殘陣，都幾難轉弱為強。
客軍小將比斯達倒戈

漢堡同杜塞爾多夫相反，經過季初低沉後近況穩步上揚，近4場聯賽2勝1和1負，唯一敗仗係對住班霸拜仁慕尼黑，其餘3仗保持一球不失，門將艾達嘅神勇演出居功至偉，除咗防守進步，漢堡中場創造力強，回巢嘅雲達華治重拾佳態，南韓小將孫弘民腳風極順，加上腳下功夫了得嘅小將比斯達愈踢愈進步，令佢哋嘅進攻組織更加立體，比斯達上季以外借身份幫助杜塞爾多夫升班，今晚倒戈自然格外精神，雖然今仗有左閘馬素贊臣因傷缺陣，但取代佢嘅艾奧高都係國腳級，漢堡無論質態都秤先，今晚作客力足坐和望贏。