基奧特倒戈「大」顯身手

猪拉多纳

小兵上齊架生，招呼蒙彼利埃

歐聯分組賽B組「大」戰爆發，英超勁旅阿仙奴今晚喺主場再遇法甲冠軍蒙彼利埃，1.57倍入球大最抵博。最近阿仙奴新「兵」器大爆發，基奧特、普多斯基同辛迪卡索拉輪流發炮，再講，上次交手基奧特冇波入，難得呢期當紅，梗係希望倒戈入波「招呼」舊隊友啦！

（有線64及204周四凌晨3:45直播）
3大「兵」器英超入12球

現時「兵工廠」落後史浩克1分，領先奧林比亞高斯1分，為爭出線主場肯定要搏，另方面嘅蒙彼利埃得1分包尾，為保法甲冠軍尊嚴，相信唔會輕易扯白旗，有利雙方駁火開入球騷。最重要係，開季前加盟嘅法國前鋒基奧特、德國王子普多斯基同西班牙大腦辛迪卡索拉終於產生化學作用，球迷唔憂冇波入。

睇番數據，阿仙奴近11個入球有8個由3大新「兵」器攻入或者做助攻，當中季初被人鬧係水貨嘅基奧特，更加挽回尊嚴，近5場勁入5粒，假如淨係計聯賽，佢哋今季攜手攻入12球，交出7次助攻，咪話唔犀利！要知道蒙彼利埃家陣有中堅希爾頓養緊傷，本身已經唔掂嘅後防線就更加靠唔住，倒戈嘅基奧特熟晒路，隨時又有機會表演。
蒙彼利埃求輸得好好睇睇

雖然蒙彼利埃將基奧特賣到阿仙奴後，前線火力下降，而且呢場有射手蘇利文尼卡馬拉要坐波監，但由於佢哋得1分，除非真係認命諗住羞家出局啦，否則今場肯定搏盡搶分，更何況「兵工廠」班守將出名唔掂，對上5場誇張到狂失13球，既然兩軍都係入得又失得，今場梗係玩大佢最着數啦！
兵工廠連開5口大

‧阿仙奴今屆喺主場以0:2不敵史浩克04，自03年9月以來首次喺歐聯分組賽主場敗陣。

‧兵工廠連續5場開入球大，期間每場至少失兩球。

‧過去8次阿仙奴迎戰法國球隊得3勝3和2負。

‧蒙彼利埃連續5場只能夠攻入1球。

‧蒙彼利埃近8場未試過半場領先，5次打和、3次落後。

歐聯B組