阿仙奴掃射蒙彼利埃

猪拉多纳

槍手連轟8球On Fire

基奧特弗到爆，力足踩多舊會一腳！歐聯B組阿仙奴主場對蒙彼利埃，主隊近兩仗狂入8球，等閒球隊難以招架；加上該名法國前鋒近3戰都有士哥，配合辛迪卡索拉及普多斯基，今仗有力繼首循環後，再度擊敗已經出局嘅蒙軍大門，捧「讓球主勝」！

（有線64及204台周四凌晨3時45分直播）

阿仙奴後防不穩，近5戰竟失13球，既然失波難免，就惟有前面入多兩球補數，而兵工廠的確做到呢一點。近兩仗主場出擊，阿仙奴先打和富咸3比3，上仗「倫敦打吡」，就大數熱刺5比2，雖然死敵於早段就少打一人，不過阿仙奴近期攻勢真係水銀瀉地，韋舒亞復出令創造力更強，辛迪卡索拉簡直上晒身，盤傳扭射瓣瓣精，加上基奧特都打起埋，兵工廠火力唔講得笑。
基奧特倒戈有計

經過季初適應期後，基奧特終於打出水準，無論頭頂腳踢都得心應手，對富咸一仗如非唔夠運，已經大演帽子戲法。事實上，佢對舊會蒙彼利埃瞭如指掌，首循環就已經協助阿仙奴贏波，今仗勢必食過翻尋味。而蒙彼利埃本季失去基奧特，令實力大打折扣，教練基拉特亦承認，球會上下都好掛住呢位球星，上輪不敵奧林比亞高斯後，蒙軍已經提早出局，加上首席射手蘇利文尼卡馬拉停賽，今場唔止輸一粒。
B組亂局

此組蒙彼利埃上仗輸波後，僅得1分已經出局，而榜首史浩克04（8分）、次席阿仙奴（7分）同第三奧林比亞高斯（6分），三軍將於最後兩輪力爭兩個出線席位。其中史浩克出線形勢最好，今戰只要主場擊敗奧軍就達標，如果有乜差池，下場鬥已經出局嘅蒙軍亦應贏波，故晉級頗穩陣。若兵工廠今輪贏波，奧軍又全失3分，阿仙奴就會同史軍齊齊出線。