阿積士半場頂得住蜜蜂

猪拉多纳

「死亡D組」真係無改錯名，呢組踢到依家剩番兩輪，出線形勢仲立立亂。雖然多蒙特以8分排緊頭，但亦唔可以抹殺排最尾嘅曼城能死裏逃生。我今日重心推介係榜首多蒙特作客阿積士呢場，揀入球細！

（有線62及202台周四凌晨3時45分直播）
入球細揀得過

有睇開德甲都知，多蒙特愈打愈正氣，唔多唔少都要讚吓教練高普悉心安排。喺要兼顧多條戰線下，「蜜蜂仔」已經保持連續7場不敗，歐聯分組賽4戰2勝2和，成績仲好過七分嘅皇家馬德里。德甲方面，上場對住升班球隊格雷特霍夫，就更係波盤全贏添！多蒙特專登揀呢場聯賽收起馬高列奧斯做後備，但羅拔利雲度夫斯基3分鐘唔使就入一球，馬里奧葛斯狀態亦夠弗，咁已經都夠照喇！由於上半場已經穩住局勢，所以下半場可以逐步收起主力，為今戰歐聯留力。

阿積士近績都唔錯，近3場不敗，雖然依家喺呢組得4分排第3，但要出線都唔係冇希望o架，何況今場重有主場之利添！再者，首回合作客多蒙特，阿積士都只係喺賽事末段先至畀對方攻入一球輸波，所以有理由相信呢隊荷甲勁旅今場會頂得住。阿積士主場硬淨，多蒙特亦近況不俗，雙方絕對有機會踢到難分高下，起碼半場打和先。睇番往績，過往兩次對賽都係多蒙特喺主場贏波。今次阿積士有主場之利近況又OK，未必會一面倒輸畀多蒙特；而由於雙方實力接近，入球應該唔會太多。
車車推介：阿積士細、半場和