蝙蝠兵唔係「仁」咁品

猪拉多纳

主場7連勝惡到暈

歐聯F組第5輪分組大戰，由華倫西亞主場迎戰拜仁，目前兩隊同得9分，拜仁以較佳對賽成績佔據榜首，不過以6分暫列第3嘅巴迪，亦對出線席位虎視眈眈。華倫西亞喺分組嘅表現係最正路嘅一隊，反而拜仁作客表現唔算穩定，意外輸畀巴迪1:3後，仲幾經辛苦先贏里爾1粒，今晚作客同組實力最接近嘅華倫未必惡得出樣，「蝙蝠兵團」受讓1.83倍嘅「讓主」有買趁早。

（有線62及202周三凌晨3:45直播）

華倫西亞喺西甲除咗季初畀拉科魯尼亞逼和3:3之外，打後7次主場出戰全部贏晒，當中能夠輕鬆擊敗如日中天嘅馬德里體育會，足證佢哋主場威力驚人。今季嘅華倫有幾個特點，佢哋喺聯賽主場演出雖然係好穩定，但相對嚟講作客就好飄忽，而且由於財政狀況唔理想，可以想像佢哋喺逢晉級都有獎金落袋嘅「歐聯金礦」，會搏到盡力求提早出線，呢點由佢哋暫時喺分組賽4戰贏晒盤就可以證明。
拜仁洛賓缺陣影響大

季初喺聯賽創下8連勝嘅拜仁勢如破竹，不過自從主場輸畀利華古遜後，狀態已經明顯回落，上周作客紐倫堡打多1個都咬唔入對手，或多或少同洛賓缺陣鋒力削弱有關，結果被逼和1:1完場。再者箭頭文迪蘇傑喺入波後同梳頓沙基利齊齊做軍禮手勢慶祝，被指係支持兩個剛啱放監嘅克羅地亞將軍或者有手尾跟，心情唔多唔少會受影響，今晚作客蝙蝠巢穴想全身而退，睇怕唔係咁容易，相信華倫可以立於不敗之地，「讓球主勝」真係唔好錯過！
張峰來料：華倫西亞（讓球主勝）

今季加盟日之泉JC晨曦的港腳張健峰，擅打左中場及左後衞多個位置，除了罰球有一手，最拿手係推介歐洲足球。