蘇斯達華歷簡奴大駁火

猪拉多纳

今晚賽事唔多，不過都有場西甲獨腳戲，皇家蘇斯達近期失去「地頭蟲」本色，今仗返主場對住華歷簡奴，都唔想喺江東父老面前再失威，不過華軍有當弗射手迪里巴錫壓陣，唔怕同你駁火，捧大最好。

（周二凌晨4時30分開賽）

其實蘇斯達今季頭三仗喺自己地頭嘅聯賽全勝，但之後經歷五戰不勝，包括主場兩連敗。不過該隊上仗勇挫前列分子馬拉加，仲要係佢哋今季作客首捷，終止頹勢之餘，眾將信心返晒嚟，雖然墨西哥前鋒卡路士韋拿可能因傷缺陣，但挾住作客開齋餘威，今返主場必想乘勝追擊。

至於華歷簡奴進攻鐵三角巴迪斯達奧、比迪同迪里巴錫愈來愈夾，後者上周中為黑山喺世盃外對聖馬力諾亦梅開二度，三人於聯賽合共轟入12球，預計今仗入波唔會少，入球大有計。
河床借小阿根廷人反彈

另外荷乙甘堡爾上仗連弱旅阿高夫都贏唔到，對住作客仲勁過主場嘅迪加史卓普冇運行，捧「讓球客勝」。阿甲河床近四仗未嘗一敗，主場迎戰小阿根廷人可睇高一線，主勝穩開。