史篤城「+1」扑錘

猪拉多纳

幾支大杉封殺安祖卡路爾

今輪英超壓軸戰韋斯咸主場對史篤城，「錘仔幫」喺有料教頭艾拿戴斯領軍下有攻有守，中前場逼搶打法效率高，相當對辦。不過，史篤城有大批悍將在陣，個個打仔格，超級硬淨，頂得住韋斯咸，史軍受讓，蘇豪要「讓球客勝」！

（有線300及200台周二凌晨4時直播）

今季三支升班球隊當中，韋斯咸級數明顯最高，佢哋重返英超火速適應比賽節奏，前仗主場鬥勁旅曼城逼到對手氣咳，上場仲作客贏埋實力分子紐卡素，真犀利！

艾拿戴斯執到班波好四正，前面由大舊中鋒安祖卡路爾爆破，身後有後上殺手路蘭作支援，中場就有雙塔班拿約同麥克盧保校炮，粗中帶幼，三線穩打穩紮。不過，「錘仔幫」今季主場對打法硬淨嘅新特蘭苦戰執番一分，今場面對搶得更勁嘅史篤城，優勢唔大。
史軍後衞頂得兩嘴

史篤城跨季十五場英超作客不勝，上次贏波已經係今年一月初，睇績確實唔多開胃。不過，佢哋今季作客演出其實已有改善，六戰三和三負，其中兩場不敵勁旅曼聯同車路士，另一場敗仗係不敵諾域治。

喂！諾域治連曼聯同阿仙奴都砌低，輸畀佢哋唔算好失禮啫！韋斯咸進攻最勁嗰招係以安祖卡路爾炸散對手後防，史篤城後防幾支大杉唔怕呢招，即使韋赫特停賽，仍有尼桑斯同格連韋倫等中場瘋狂搶截，可保不敗！