霎眼嬌當寶哪門子Style

猪拉多纳

在「面書」被老友洗版前，拿仁對南韓肥佬Rapper PSY，真係聞所未聞。小弟一向膚淺，屬「唯美派主義者」，見此大叔肥頭耷耳賣相麻麻，連click入條link、睇睇佢係乜水都冇興趣。但經《Gangnam Style》鋪天蓋地日夜轟炸後，終被徹底洗腦。

有幸親身見證「江南旋風」熱爆全球，勁到連Madonna都搵PSY跳騎馬舞、仲捐埋佢褲襠，拿仁有兩個感想。一係戥哥哥唔抵，如果佢遲出世廿年，有七億點擊率嘅肯定係《Monica》，幾時輪到PSY也交也武？二係終於知道咩叫時來運到，個天要你大紅大紫，想避都避唔到。

創業難，守業更難。此肥佬將來變埋肥伯，相信都仲要繼續「騎馬」，成一曲歌王。球壇上亦大把「霎眼嬌」，年中乜乜「新美斯」、物物「新馬納當拿」多到爆，但有幾多個堅勁？就算「新比利」尼馬被捧上天，但一日未到歐洲接受真正考驗，無論個朵幾勁，都係聽到嚇一跳，然後得啖笑。
紅軍應趁好價放史達寧

歐洲球壇生態早已扭曲，英超更變態得可怕。係英籍就如鑲金，達寧身價2千萬鎊，簡直係神級笑話。利物浦17歲小將史達寧，本季演出的確不俗，但身形紙咁薄，未來頂多只係另一個艾朗連儂。近日有傳阿仙奴領隊雲格，想用禾確特加8百萬鎊bid史達寧，如果屬實，紅軍飯應啦；等第時史達寧好似安祖卡路爾咁瘋狂跌價，嗰陣先揼心口就太遲！