農舍不設防黑貓偷食

猪拉多纳

英超周日獨腳戲由富咸主場對新特蘭，富咸簽埋星級射手貝碧托夫，中前場充斥技術型球員，踢得愈來愈好睇，不過新特蘭班爛仔專砌技術型球隊，今場冇埋首席射手史提芬費查，無力建設，咁咪全心搞破壞囉！「黑貓」專心死守好硬淨，預期可保不敗，受讓半一博下盤！

（有線300及200台周一凌晨零時直播）

富咸上次喺倫敦打吡作客阿仙奴放膽同對手鬥攻，最終搶得一分，演出惹人好感。佢哋上次受讓贏盤，今場返主場被捧成熱門，主Ｗ不足1.6倍，足足要讓半一，明顯讓多咗，由冷變熱不得不防。單睇人腳，富咸中前場進攻主力貝碧托夫同拜仁雷斯等都弗，火力必在「黑貓」之上，佢哋近三戰入八粒，但同時失八球，後防應付死球麻麻，讓波靠唔住。
新特蘭爛仔波受讓最啱

新特蘭隊長卡達莫及射手史提芬費查有傷在身難望披甲，「黑貓」聯賽入七粒，史提芬費查獨佔其五，但其實佢過去五場聯賽都冇士哥，球隊進攻路數畀人睇通，改用沙夏或其他前鋒試試未必係壞事。況且新特蘭向來唔係建設派，破壞先係佢哋強項，今場做好防守伺機反擊，有本錢偷雞，佢哋季初作客阿仙奴都頂得住，點會怕富咸呢，一於要下盤！