西布朗突擊煞食唔怕「車」撞

猪拉多纳

九死一生，絕處逢生！西布朗喺上季主場擊敗車路士結束11連敗，仲成功連續第3個賽季亮相英超絕非僥倖，皆因戰術部署十分清晰，仲要呢季主場着晒火，腳腳七注要食過翻尋味，實行搞到「藍戰士」冇啖好食！

英超賽季踢咗仲未夠三分之一，但西布朗已經執咗20分，接近護級安全分數嘅一半，睇怕今季都係唔愁降班，佢哋嘅強勢表現主要嚟自主場6戰5勝，完全合乎中下游球隊主強客弱嘅特徵。
車路士隊長泰利打柴

西布朗擅長穩守突擊，強調立足喺穩固防守前提下，積極通過邊路突破傳中波嘅攻門機會。不過，每當遇上同級對手時，呢套戰術就冇乜得發揮，事關敵軍冇咁易中計而形成拉鋸。相反一遇到畀豪門撳住嚟砌，突擊效率就大幅提升，尤其係快速反擊嘅人多打人少，充分凸顯呢招嘅煞食之處！

況且「藍戰士」依家整體協防不足，加上泰利一傷再傷倦勤，牽一髮動全身，車路士惟有加強布防以免陷於困局。