荷德宿敵戰馬會轉盤撐德

猪拉多纳

另一場重量級大戰荷蘭主場對德國，賽前橙軍主帥尹戈爾口出狂言，話德軍依家踢出流暢嘅進攻足球，係從佢當年執教拜仁慕尼黑時嘅戰術上偷師，搞到賽前火藥味濃。「日耳曼軍團」近八仗轟入23粒，火力全開，有力打殘青黃不接嘅橙軍，足智彩亦由初盤荷蘭讓平半改為平手盤，擺明睇好德國。莊家畀晒貼士，當然捧「日耳曼軍團」啦！

（now 632及100周四凌晨3時30分直播）

荷蘭主帥尹戈爾不嬲自大，自尊心又重，由於唔忿氣2011年畀拜仁中途炒魷，日前炮轟老東家高層漢尼斯霸道，講到興起仲燒埋德國隊嗰疊，話德軍領隊勒夫抄襲當年其執教拜仁時嘅打法，例如將舒韋恩史迪加移任防中，及採用4231陣式，德軍踢出依家行雲流水嘅進攻足球，應該歸功於佢咁話。勒夫則反駁其單箭頭陣式，早喺08年歐國盃時已經用緊。
德軍超殘陣照轉平手盤

尹帥咁樣講燃點了德軍對呢場無關痛癢熱身賽嘅戰意。經過上仗領先四球下畀瑞典逼和後，勒夫極需要一場具說服力嘅勝仗重建威信。雖然「拜仁三寶」謝路美保定、舒韋恩史迪加、卻奧斯因傷冇入選，高路斯同奧爾斯亦倦勤，但仍有馬高列奧斯、馬里奧葛斯、曉姆斯等「蜜蜂仔」，勒帥亦冇選甩漏多多嘅中堅畢斯杜巴，令防線穩陣好多。

相反荷蘭有隊長史奈達、尹佩斯兩大主力倦勤，前場嘅亨特拉爾、雲達華治、阿費利、洛賓等均喺德甲搵食，德國隊對佢哋可謂熟晒路，其中洛賓都係傷愈冇耐，狀態麻麻。不過最恐怖都係後防，唔係冇速度嘅希汀加及馬菲臣，就係太過嫩口嘅積祖威廉斯、真馬特及連積，點頂得住德軍鋒線？連足智彩都要轉盤，德國由原本受讓變成平手，絕對好路。