燕豪芬奏「海」歌

猪拉多纳

射手馬達夫斯搶印象分

勁開心呀！唔係賣花讚花香，小妹堅覺得自己叻女o架，因為小妹竟然能夠喺「地獄賽程」入面，擠到半日時間出嚟溫書，然後考車牌筆試一Take Pass，問你怕未？咩呀，你哋覺得好易啫，對小妹呢個路癡兼有背書恐懼症嘅人嚟講，就好難o架啦！喂，我考嗰陣仲生緊眼挑針，睇嘢好辛苦o架，畀吓面，畀我讚吓自己都得啩！

小妹考筆試Pass咗，不過燕豪芬（簡稱PSV）件前鋒馬達夫斯就要加多兩錢肉緊先掂喇！呢位斯洛文尼亞射手喺舊年由格羅寧根來投，着住件9號波衫，好多人都以為佢好猛料啦，點知佢轉會後冇晒喺格羅寧根單天保至尊嗰種霸氣，搞到PSV季前再整多三件鋒將返嚟，馬達夫斯差啲企都冇碇企！

好彩，「達哥」有嘅係質素同運氣，開季冇耐，PSV首席射手托禾倫打咗柴，馬達夫斯終於獲得重用，家陣揸住5個聯賽士哥，狀態回復番多少，今晚PSV喺主場鬥海倫芬，就係馬達夫斯搏命入多幾粒、證明自己嘅好時機喇！點解咁講？事關「達哥」後面有兩大中場撐住囉！攻有10號仔韋拿杜姆、守就有啱啱傷愈復出嘅雲邦美，馬達夫斯根本唔愁冇供應！
海倫芬「士哥拿」傷臀或缺陣

對家海倫芬原本都有件好勁嘅前鋒艾費特芬保加臣o架，呢個冰島仔11戰入咗9球，係隊中首席射手，教練雲巴士頓仲點名話佢係未來之星添！不過點勁都冇用啦，芬保加臣賽前證實臀部有傷，今戰未必落場，最慘係入得2球都叫次席射手嘅菲臘杜歷錫，早排又整親膝頭要抖2星期，冇晒反擊能力之餘，後防大將拉達拿又打埋柴，海倫芬今鋪對住PSV，輸少粒都偷笑啦，PSV個1.54倍「讓主」博得過o架！
微博傳情：苦盡「羔」來！

經過兩星期嘅「地獄賽程」，小妹喺早幾日終於可以放假大玩特玩，出門口嗰陣，小妹對住塊鏡，真係有想喊嘅衝動。算啦，都捱過咗，惟有拎起粉底，怒將所有暗瘡眼挑針粉刺全部遮晒，回復番半個靚樣，同好友「共晉蟹宴」，你哋睇，呢隻大閘蟹幾多羔！正呀！
推介：燕豪芬（讓主）