曼城內耗讓唔起熱刺

猪拉多纳

近期睇曼城賽事戰況基本上大同小異，中前場球員走位唔多，偶然見到耶耶托尼、阿古路同泰維斯等人硬闖，作用有限，自從10月尾喺歐聯作客輸畀阿積士後，呢種情況一直持續到上周主場逼和阿積士，期間佢哋4戰僅贏1場，唯一勝仗都只係喺主場苦戰險勝史雲斯，無復上季遇神殺神之勢。

有人歸咎於指揮官大衞施華養傷削弱創造力，施華仔係重要，但未有本事搞到成班隊友失去戰意，英國傳媒多番報道球會內部出現問題，似乎並非空穴來風。曼城上季雖然成功奪冠，但文仙尼仍然不得民心，今夏簽埋嫡系球員馬爾干想鞏固勢力，點知米卡李察士及尼史葛等土炮遭冷落伺機生事，呢支億萬大軍用錢堆砌出嚟，經唔起內亂打擊，今仗遇正實力唔差嘅熱刺，曼城未必頂得住。
保亞斯執番掂班波

熱刺少帥保亞斯接手初期同樣面對內部問題，隨住踢走莫迪歷同雲達華治等「異見分子」，總算重新建立自己班底，佢重用射手迪科爾，為報知遇之恩，呢位球星場場去盡，上仗又喺歐霸盃「戴帽」入3球。熱刺最煞食嗰瓣始終係兩翼側擊，加里夫巴利同艾朗連儂喺作客環境下有更多空間發揮高速，今次鬥曼城又有機會畀佢哋喪跑，作客贏埋絕不為奇，受讓一球必捧下盤！