迪比復出ＦＣ悉尼有勝算

猪拉多纳

今日澳職「悉尼雙雄」分途出擊，「大佬」FC悉尼主場迎戰墨爾本勝利，主隊上仗缺少迪比亞路之下，慘遭中岸水手血洗輸2比7。幸好呢位意大利老金童已傷愈，今場可復出主持大局，大大振奮士氣及增強鋒力，誓要喺擁躉面前贏番場挽回面子，FC悉尼小讓平半，Mic少捧上盤。

（周六下午4時45分開賽）

FC悉尼原本表現唔錯，迪比亞路連番入波下，一度取得兩連勝，但呢位世界級球星上仗因傷倦勤，球隊一時陣腳大亂而慘敗。不過，一切已成過去，迪比亞路傷勢已無大礙，揚言有信心今場復出搏殺，佢仲呼籲隊友忘記上場敗仗，專心應付餘下賽事。
墨爾本勝利防線穿窿

FC悉尼上下以迪比亞路馬首是瞻，佢開聲激勵士氣，相信可以提升隊友信心，尤其係經過一場大敗後，各位球員應會知恥近乎勇，踢場爭氣波。墨爾本勝利今季兩場作客都輸波，包括吞布里斯班獅吼五蛋，佢哋最大問題係防守差，五場聯賽都有失波，而且平均每場失超過兩球，遇到入球把握力極強嘅迪比亞路，肯定有難。

另一場西悉尼流浪者主場對紐卡素噴射機，今季新加入澳職嘅流浪者已開始站穩陣腳，連贏兩場，球員建立信心表現會更加放。噴射機今季擁有前英格蘭國腳希斯基助陣，攻力大增，勢必利用呢位射手同主隊火併，捧入球大。

（周六下午2時30分開賽）