蔚山現代捧盃「吉」兆

猪拉多纳

近3季決賽勁吹韓風

亞冠盃王者戰會喺今日傍晚上演，南韓大軍蔚山現代喺主場迎戰沙特阿拉伯勁旅吉達艾阿里。南韓球會近年喺亞冠盃表現Sharp醒，對上三屆取得兩冠一亞，全面取代日本領導地位。蔚山今屆以不敗姿態殺入決賽，霸氣逼人，今次有望延續呢股強勁韓風，捧主勝！

（now 670周六晚6時30分直播）

南韓球壇近年不時爆出假波醜聞，當地搵食球隊多的是，唔少頂級球員都涉案，非常黑暗，有部分莊家索性唔開盤，費事畀人搞。佢哋為錢打假，但班球員一嚟真嗰陣好犀利，韓職球隊近年喺亞冠盃惡到暈，自09年起決賽改為一場過，三支韓職大軍共取得兩冠一亞，上屆全北汽車以大熱門姿態主場撲擊艾薩德，點知爆冷失冠，未能完成韓職三連霸，但無損韓職穩佔東亞區領導地位，依家日職球隊都要靠邊站！
主場狂攻吉達艾阿里

南韓咁多假波，今場會唔會又打假呢？換轉係以前真係唔出奇，不過韓職球隊個底花晒，一舉一動被人(目及)到實，今場仲要係決賽，唔會咁傻啩！況且亞冠盃冠軍獎金都有150萬美元，計埋之前晉級嗰筆數加埋超過200萬美元，足以成為蔚山現代爭勝一大動力。蔚山今次以主人家身份出戰，話晒都喺自己地頭，點都會加多兩錢肉緊，隊中兩大主力李根鎬同拉芬夏喺日職回流後愈踢愈好，加埋大舊中鋒金信旭，實攻到對手慌！

睇番蔚山現代今屆晉級過程，佢哋喺分組賽六戰不敗，踏入淘汰賽不分主客一律贏晒，正氣到不得了，班波有真材實料，仲佔盡地利，有晒條件封王！吉達艾阿里上圈踢走另一支沙特勁旅伊蒂哈德，大軍擁有阿曼射手賀斯尼同巴西箭頭域陀奧利華拉等外援，級數唔弱，但拍埋蔚山度始終都係差多少，蘇豪今場捧主勝，另外兩隊士哥能力強，兼顧大盤。
近3屆亞冠盃決賽成績

2011 全北汽車（南韓）2:2（1:1）艾薩德（卡塔爾）

加時2:2，艾薩德12碼勝4:2

2010* 城南一和（南韓）3:1（1:0）索柏阿漢（伊朗）

2009* 浦項制鐵（南韓）2:1（0:0）伊蒂哈德（沙特阿拉伯）

註：前者主場，*為中立場