撐愛華頓讓球勝

猪拉多纳

主場強陣捉黑貓

周中喺歐洲賽好彩總算執到少少，我發現原來投X歐洲賽時，特別係歐霸，追德國球隊永遠有着數，因為佢哋多數會搏到盡，好過投X成日收起啲主力嘅意甲或英超球隊。今晚為咗避開歐聯歐霸後遺症，一於揀場兩隊都無份踢歐洲賽嘅英超賽事。愛華頓似乎對下季歐洲賽席位都好有意思，今晚喺主場對住排名低佢哋好多嘅新特蘭，應該可以贏波，向目標邁進。
莫耶斯領軍未輸過

愛華頓今季表現算正路好多，打咗10場聯賽只輸過1場咁大把，主場依然不敗，錄得有2勝2和，當中更包括贏過我愛隊曼聯添，今晚呢場愛華頓起碼喺心理上佔優，因為自從莫耶斯2002年上任後，對過新特蘭17次，「拖肥糖」有12勝5和嘅不敗往績，絕對可以話係「格食格」。

愛華頓除咗作客西布朗嗰場，其餘每場英超都有波入，攻力有保證，中場「爆炸頭」費蘭尼已經轟入5球，再加埋克羅地亞前鋒謝拉域狀態亦弗爆，球隊喺4連和之後，睇嚟今晚係時候贏番場嘞。
新特蘭入球率低

「黑貓」新特蘭真係冇改錯名，今季唔單止冇乜波入仲成日和波，真係黑仔。球隊踢咗9場聯賽只係入得6球，全英超以佢哋攻力最差，連升班馬都不如。近3場比賽更加係零入球，一支球隊唔識入波點敢買落去呀？佢哋過去5場作客聯賽仲要係4和1負未贏過呀，坦白講，我個人就鍾意狗多過貓，所以今晚呢隻黑貓唔多啱我，反而食飽飯後嗒番粒「糖」，贏番口「讓球勝」，隨時甜到入心o架！

（有線301及201台周六晚11時直播）
Wendy推介：愛華頓 讓球勝