些路迪走樣巴塞撳住搶

猪拉多纳

「地上最強」巴塞隆拿有最強中堅碧基復出，擺番個靚陣今晚喺歐聯G組出訪些路迪，以佢哋近排5連勝氣勢同超班實力，加上美斯急住入波向囝囝送大禮，要大炒些路迪又有幾難？力奇撐硬巴塞1.63倍「讓球客勝」！（有線62、202及中央5台周四凌晨3:45直播）

兩班波上次喺魯營交手，巴塞只係靠佐迪艾巴完場前入波險勝2:1，不過咪以為些路迪可以重演歷史，事關佢哋近況相比當日差好多，近4戰就只得1勝1和2負，上周末喺蘇超對住登地聯，打到完場前1分鐘竟然連輸兩球被逼和2:2，成班波信心冇晒啦！
碧基復出取代艾迪安奴

巴塞呢邊，因傷抖咗成個月有多嘅碧基終於復出，絕對係及時雨，事關佢哋今仗有布斯基斯坐波監同艾迪安奴養傷，但中堅位有碧基復出頂住，整體防守力可以投番信心一票。前線除咗有美斯繼續孭飛，後備席廂仲有個逐漸回復佳態嘅韋拿候命，尋日西班牙傳媒話有名醫指出，舊年韋拿喺世冠盃重傷，急住由日本坐飛機返西班牙先醫，原來係極之危險決定，事關喺高空受氣壓影響，隨時有截肢可能，正所謂大難不死必有後福，今晚梗係睇佢同美斯表演啦！

歐聯G組