紅魔剪布冧老細

猪拉多纳

費Sir領軍26周年

今晚續演歐聯第四輪分組賽，英超班霸曼聯在H組作客布拉加，撞正老帥費格遜領軍26周年之喜，有乜嘢好得過贏波提早出線喜上加喜先！老費銅像月尾會喺奧脫福球場面世，佢賽前講明今場要贏，阿Sir柯打已落，眾星豈敢不從，就算收起後防主力仍然夠殺，讓平半要上盤！（有線61及201台周四凌晨3時45分直播）

費格遜喺86年11月初接掌曼聯，一手打造紅魔王朝，早被捧上神枱，進入領軍26周年紀念日，會方晨早整定個銅像，仲擇好吉日，費Sir 86年11月22日首次喺主場領軍，老費像本月23日開始會喺奧脫福球場畀球迷「朝拜」。查實搞埋呢啲紀念活動冇乜謂，最實際都係班波交出靚績畀費爵爺攞威，今場鬥布拉加賽前，佢講明要贏波提早出線，軍令一下，班球員實搏。
布拉加突擊瓣數露晒餡

曼聯現時防線仍然唔齊腳，預期會沿用上次主場鬥布拉加人腳，里奧費迪南及艾拉等老將抖抖，卡域克有機會再串演中堅，經過上次早段連環失守後，今仗面對布拉加突擊相信會守得好啲。紅魔鬼後防擺明唔掂，勝在前面多人用，王牌前鋒尹佩斯弗爆，即使收起呢位星級射手，仲有查維亞靴南迪斯、拿尼、費查等後備兵，呢班所謂副選一樣好打得，逐個秤點都叻過布拉加。

布拉加上次作客奧脫福頭威頭勢，攻擊主力艾達盧比斯同阿倫等踢落有紋有路，但當紅魔鬼發力狂追之時，班兵即刻立晒水，冇計啦，佢哋始終少踢大賽，加上級數唔及對手，今次縱有主場之利亦難有作為，受讓都信唔過，捧紅魔！