曼城仲有兩個機會

猪拉多纳

歐聯分組賽去到第4輪比賽，死亡D組曼城再鬥阿積士。上次阿積士憑主場之利擊敗曼城，今次輪到曼城有地利，Peter都睇好呢支英超冠軍可以報回一箭之仇。但就算曼城順利贏波，出線16強都係得兩個機會——就係渺茫機會同埋冇機會。
不知團隊為何物

文仙尼踢而優則教，亦曾經帶領隊國際米蘭及曼城贏得聯賽冠軍，但好奇怪，文仙尼就好似中咗歐聯魔咒咁，只得參與但冇份爭標。其實足球嘅嘢未必咁邪門，只係好多內在因素畀大家忽略，曼城係一支用大量金錢急促堆砌嘅球隊，Peter承認佢哋確有好多高質素球員，但與其他傳統勁旅比較，就缺少咗一套完整嘅青訓系統，亦冇輝煌歷史去支持。球員只為高薪合約而比賽，團結性自然不足，所謂Team字沒有I，Peter經常強調足球係團體運動，要爭取好成績就要放下自我，以團隊最大利益為依歸。當球員只求表現自己以換取更高酬金，對球隊發展絕唔係一件好事。

再講，曼城經常有內訌，唔敢講所有不利消息都係事實，但Peter可以肯定球員與領隊文仙尼嘅關係好緊張。老實講，要令眾多球星融合成一支球隊並唔係講咁簡單，文仙尼似乎做唔到。恕Peter大膽講句，文仙尼仲未係一流領隊，比較起經驗豐富嘅費Sir、哥迪奧拿及莫連奴等幾位知名領隊，文仙尼仲有排學。