AC回勇拉唔住

猪拉多纳

唔經唔覺，歐聯分組賽喺今晚已經踢到第4輪，即係話每隊之前都已經同同組對手交過手，依家係次循環嘅開始！C組嘅AC米蘭近日可以話全面復甦，近兩場聯賽終於表現出過往嘅霸氣，上仗以5比1大勝基爾禾，為今晚主場迎戰馬拉加一振士氣！AC米蘭小讓平半，力捧上盤。（有線63及203台周三凌晨3時45分直播）

雖然傳媒經常放風話教練阿里基個位坐唔穩，但若果今晚報番上次輸畀馬拉加一戰之仇，令出線機會大增，我認為佢都可以坐多陣！阿里基前排採用3-4-3陣式，搞到隊波攻不銳守不穩，但吸取意見後，近日轉打番4人防線就即刻回勇。今季表現愈來愈成熟嘅艾沙拉維，配合復出嘅柏圖、柏仙尼等等，攻力已見改善；仲有保贊亦有進步，班米蘭高層打算向巴塞隆拿買斷佢。AC新一代個個逐漸上位，即使羅賓奴繼續受傷，都冇乜問題。

AC上輪作客馬拉加以0比1僅敗，戰況當然唔係一面倒被壓啦！所以今晚返聖西路絕對有能力扭轉局勢。佢哋暫時有4分排小組第2，想出線非搏不可，我會信近態回勇嘅AC囉！
馬拉加夠分冇咁肉緊

馬拉加就暫時以9分排榜首，出線形勢極佳。上輪祖亞昆喺上半場曾射失12碼，好在下半場佢一箭定江山將功補過。雖然馬拉加今年表現四平八穩，沙維奧拿、伊斯高、祖亞昆等個個都有態，但始終踢歐聯作客都要有一定歐戰經驗，所以今場較為睇淡。同組仲有隊安德列治做魚腩，所以即使馬拉加今晚輸波，仍然有好大出線機會，今晚一於撐主隊！

推介：AC米蘭 上盤