超級翼鋒連環復出

猪拉多纳

拜仁夫添o趙漢堡

上周被終止聯賽8連勝走勢嘅拜仁慕尼黑，今晚喺德甲出訪漢堡，絕對有本事連本帶利贏番鋪勁，事關佢哋一對超級翼鋒洛賓同列貝利近仗連環復出，可以最強火力出戰，以佢哋嘅超班實力唔難大勝一場，1.86倍「讓球客勝」要捧！

（有線61、64、201、204及中央5台周日凌晨1:30直播）
漢堡中場唔齊腳

拜仁上周畀利華古遜砌低確令人意外，但講到底，佢哋家陣喺聯賽榜仲有4分領先優勢，真係有乜好驚吖？周中佢哋喺德國盃收起部分主力都照炒凱沙羅頓4蛋，當日復出擔正嘅洛賓，就即刻省2粒證明身價，今晚就連列貝利都話準備就緒，主帥軒歷基斯手上大把籌碼可用，加埋今季入波易過執豆嘅文迪蘇傑喺前線孭飛，要食「漢堡包」又有幾難？

漢堡今季主場只得2勝2負，唔算突出，佢哋嘅南韓仔孫弘民係就係實力唔差，但對住拜仁會唔會怯場就真係難講，若果前線只靠雲達華治支撐，雙拳點敵四手？仲有，佢哋中場人腳其實都幾緊絀，香港仔林志堅體能狀況唔理想預計唔會落場，塞爾維亞中場拉積高域又停賽，仲有捷克兵積拉錫因傷倦勤，遇強手擺唔到強陣，受讓都咪掂呀！