黑貓主戰維拉細好路！

猪拉多纳

今個禮拜嘅英超大戰梗係今晚頭場曼聯大戰阿仙奴啦！呢場一樣有3D版本，安排喺高清204直播。但講到心水，小妹就有場中下游對決推介畀大家，就係新特蘭主場迎戰阿士東維拉嘅入球細嘞！

（有線302及202台周六晚11時直播）

新特蘭同維拉開季成績令人失望，兩隊入球能力極低，士哥數字喺英超20隊波當中排緊倒數一、二名。新特蘭聯賽8場波入面只係入咗6球，其中5球係由射手史提芬費查所入，但由於「黑貓」陣式係打單箭頭，當史提芬費查被對方後防凍結後，就要靠攻擊中場例如施巴斯坦拿臣、阿當莊臣等後上幫拖，可惜暫時嚟講整套進攻模式都未能發揮作用。幸好佢哋條後防線都幾可靠，現時只失8球，僅僅比失球數字最低嘅阿仙奴多兩球。
兩隊贏波本錢欠奉

維拉方面暫時排17，徘徊喺降班區域，佢哋今季起用好多年輕球員，雖然有活力，但經驗方面就比較輸蝕，連續兩場聯賽都喺比賽末段時間失波兼失分，呢隊波作客表現亦唔掂，對住升班馬修咸頓都要慘敗1比4，今場遇上新特蘭，要搶分就更加有難度。兩隊都冇乜贏波本錢，玩細盤好過啦！
Wendy推介：

新特蘭對阿士東維拉 入球細