仙魔大戰 尹佩斯二五騷

猪拉多纳

「兵工廠叛徒」尹佩斯今晚喺奧脫福球場披起曼聯戰衣倒戈鬥阿仙奴，「紅魔鬼」上季喺主場8比2血洗「兵工廠」，令尹佩斯醒覺留喺阿仙奴冇得發圍，今夏不惜背負二五仔污名入「魔」，呢次掉轉槍頭實畀班「廠粉」噓爆，既然係咁，咪入多幾粒博取「紅魔迷」掌聲囉！兩隊同樣攻強守弱，曼聯連開9口大，博佢哋開夠10口，追大！

（有線300及200台周六晚8時45分直播）
預咗你鬧 更加搏命

陪伴阿仙奴經歷7年錦標荒後，尹佩斯今夏決定加盟「兵工廠」老對手曼聯，令全球「廠粉」嬲到癲！不過，站喺尹佩斯角度睇，佢就快三張嘢，阿仙奴教頭雲格又慳家唔買人，班波根本未夠料爭標，曼聯開出一份豐厚合約，球會仲掛住個奪得最多英超冠軍嘅金漆招牌，眼前係個名利雙收嘅餐士，呢個機會主義者當然唔會放過。揀得呢條路，預咗畀人話係反骨仔，今場佢首次倒戈出戰，恩師雲格叫「廠粉」口下留情，但尹佩斯好來好勝，對面噓得愈勁，只會令佢更起勁。

今場「仙魔戰」勝負關鍵因素，正正係兩隊前鋒把握力，曼聯上季未有尹佩斯都喺奧脫福球場以8比2狂數阿仙奴，家陣有埋呢位射手，可謂如虎添翼，此消彼長之下，兩隊距離拉得更遠。現時「紅魔鬼」前線以尹佩斯同朗尼做雙膽，拖住韋碧克或查維亞靴南迪斯，幾個射手都弗，進攻火力好強。阿仙奴失去尹佩斯，簽下普多斯基同基奧特諗住兩個頂一個，前者並非正宗射手，後者把握力極弱，另一箭頭謝雲奴養緊傷，鋒線唯一希望係上場喺聯賽盃連中三元嘅禾確特。
曼聯入得又失得

講到「紅魔鬼」前面咁醒，但佢哋並非天下無敵，皆因大軍仍未解決後防問題，連續4場都失兩球，撇除上場聯賽盃鬥車路士出副選防線唔計，其餘3戰史篤城、布拉加同車路士踢成咁點解釋先？曼聯續有尼曼查維迪、菲爾鍾斯同基斯史摩寧等守將養傷，一對中堅里奧費迪南同莊尼伊雲斯搏到殘，今場贏面確係較高，但難保清白之身，主勝偏熱唔抵玩，佢哋對上9場賽事大晒，長路未見盡時，一於追多口大啦！