紅魔唔還債再砌車

猪拉多纳

英格蘭聯賽盃十六強超級大戰車路士主場再鬥曼聯，兩隊剛過去周日碰頭製造多個爭議場面，匆匆再戰肯定好睇過戲，想睇直播，唔好意思，中港澳都冇噃，要上網自己搵link喇！紅魔鬼上場聯賽靠球證幫手搞掂車仔，將全球「反曼」熱潮推至新高峰，坊間甚至流傳「還債論」，指曼聯今場要讓路，個人認為呢類講法只係得啖笑，盃仔場合鬥後備，呢點紅魔鬼佔優，受讓再追「讓球客勝」！

（周四凌晨3時45分開賽）
後備兵質素勝車仔

曼聯上場多得球證卡頓保幫手趕走兩個車路士球員，最終11打9靠個越位士哥贏波，「反曼」球迷直斥紅魔鬼勝之不武，站在教頭費格遜角度，贏波就是一切，過程完全唔重要，所謂「還債論」更加係多餘，以老費江湖地位，球證幫手係平常事，還乜債？撇開所有恩恩怨怨，今場盃仔賽事純鬥後備兵，曼聯料用拿尼、費查、路爾斯安達臣及韋碧克等人，乜咁似正選嘅！車仔又點？賴恩貝特蘭、域陀摩西斯、史杜列治同馬高馬連等人，堅係後備喎，仲讓波，反啦！