紅魔狂炸布拉加

猪拉多纳

英超勁旅曼聯開季防守曳成日先失，教頭費格遜鬧極都冇改善，近期把幾火索性以攻代守，直落連開六口大，今晚歐聯H組主場鬥葡超大軍布拉加，繼續擺大個頭狂攻對手，睇怕又會上演另一場入球騷，再追大盤！

（有線61及201台周三凌晨2時45分直播）

曼聯季初後防傷兵多，踢落走晒樣，中路防守特別唔掂，衰到搵過卡域克串演中堅，即使近排用番里奧費迪南搭莊尼伊雲斯，效果仍然麻麻，缺少尼曼查維迪，點都差啲。「紅魔鬼」今季踢落好慢熱，早段後防唔夠集中，經常先失波，費Sir唔止一次叫班兵肉緊啲，可惜班友仔當係耳邊風，大軍近四戰三場先失，睇嚟老費都冇晒符，今場對手布拉加鋒力唔算好勁，但恐怕佢哋都係難保清白之身。
朗尼尹佩斯擦出火花

後防唔掂，惟有靠前面入多幾粒補數囉，「紅魔鬼」喺聯賽八戰入廿一粒，數字冠絕英超，佢哋前線擁有四大天王，尹佩斯、朗尼、韋碧克同查維亞靴南迪斯個個有分量，前三者上場對史篤城包辦四個士哥，其中朗尼梅開二度順番晒，依家佢同尹佩斯愈夾愈熟，呢對星級進攻組合好鬼得人驚，後備箭頭查維亞靴南迪斯餓波多時，若然有份落場肯定唔會放過任何士哥機會。

曼聯喺H組超晒班，出線機會好高，剩番三隊爭一個出線席位，葡超大軍布拉加分組賽兩戰一勝一負，發揮唔錯，大軍箭頭艾達盧比斯近況好，趁「紅魔鬼」防線不穩，有機會偷雞士哥，但球隊整體戰鬥力一般，作客奧脫福難望爆冷。經過上屆歐聯羞家出局後，曼聯將帥同樣唔敢托大，但大軍守得唔穩，玩「讓球主勝」風險高，一於捧佢哋連開七口大啦！