獅吼重拾霸氣「威」力驚人

猪拉多纳

澳職威靈頓鳳凰上周陣容不整下搶番1分，今場仲有多名新西蘭國腳歸隊，坐鎮主場出戰布里斯班獅吼表面睇佔盡天時地利，但卡爾萬就唔係咁睇，仲覺得獅吼讓平半有2倍好值博。

（開賽時間：周日上午11:30）

鳳凰作客雄心嗰場成班主力被國家隊徵召，靠班小將都後上逼和睇落好掂，但查實唔係對方下半場一開波就輸球12碼兼踢少個，追唔追和到都成問題。
鳳凰5國腳踢完太公波未回氣

至於布洛奇、貝圖斯在內嘅5名新西蘭國腳兼教練歷奇靴拔喺世盃外圍賽主客兩場對完大溪地後歸隊，陣容係就係完整番，但匆匆再戰未必回得切氣，今場演出隨時走樣。

今季力爭總冠軍3連霸嘅獅吼出閘脫腳輸咗畀光輝，但佢哋返主場即刻以5:0一球不失大炒勝利，重現王者霸氣，教練拉度維度錫賽後話條防線可以再好啲，仲拋低句：「入波係可以贏波，但我覺得唔失波可以帶嚟榮譽。」

獅吼咁重視防守下已值得留意，何況中場發電機布萊治同上季神射手貝利沙嘅強大火力，小讓平半收十足，抵博！