愛華頓昆士柏難分高下

猪拉多纳

由於周中有歐聯關係，大部分強隊昨晚已率先登場，因此今晚賽事以二三線球隊為主，其中英超愛華頓對昆士柏流浪，前者在主帥莫耶斯領導下，今季以蔗渣價錢踢出燒鵝味道，雖然今仗對住燒鵝價錢只踢出蔗渣味道的昆士柏流浪，但後者畢竟實力唔曳，「拖肥」作客之餘仲要讓波，實在唔划算，大有機會握手言和。
海明威做膽 和波3串4

而英超東北打吡新特蘭對紐卡素，儘管「黑貓」有主場之利，但兩軍對親都火花四濺打甩髀，主場優勢並不明顯，而紐卡素有塞內加爾黑雙煞丹巴巴亞同柏比斯施斯坐鎮，有權搶番一分。至於西甲奧沙辛拿迎戰貝迪斯，前者位處近法國邊境的潘普洛納，美國大文豪海明威在第一次世界大戰之後，曾在這個奔牛城hea咗一段時間，之後更寫成《The Sun Also Rises》一書，描述當地奔牛節的熱鬧場面。貝迪斯位居前列，來到潘普洛納要贏波亦唔容易，預計奧沙辛拿賽和對手冇難度，以這個海明威至愛做膽，串埋上述兩場英超，呢個刀仔鋸大樹和波3串4，中咗都幾「和」味。
金句：富貴險中求 和波3串4 海明威至愛做膽