昆士柏 愛華頓勢演「大」龍鳳

猪拉多纳

一隊求開齋必喪攻、一隊入波如食生菜，呢類對撼當然旺入波！今輪英超壓軸戰，昆士柏流浪主場鬥愛華頓，QPR本季聯賽仲未贏過，領隊曉士震過貓王，必出夫添爭取入球；「拖肥糖」本季5次客戰4次開大，今戰必捧大盤！

（有線300及200台周日晚11時直播）

QPR個馬來西亞富豪老細，都幾有心搞波，本季大開水喉買入唔少「名將」，可惜朴智星等已經英雄遲暮，故目前喺榜尾苦苦掙扎。
昆士柏搶韁求開齋

領隊曉士表面上雖得到老闆支持，但再唔贏壓力就愈來愈大，今次有主場之利，相信會盡派森莫亞、施斯、格尼路3大攻擊手同時落場，而兩翼泰拉拔同胡禮菲臘斯亦具侵略性，今場會盡量谷上求入波。可惜呢班波後防執極唔掂，安頓費迪南等唔夠班，近6仗失13球，今場難保清白之身。

愛華頓本季踢到曉飛，攻力比以往大大增強，近5仗喪入11球，其中費蘭尼非常搶鏡。「爆炸頭」今仗雖缺陣，但謝拉域、米拿拉斯實而不華，甚至安尼捷比都屢有佳作，今場面對主隊豆腐防線，分分鐘自己入波都夠開大！