紐記鐵三角圍捕黑貓

猪拉多纳

紐卡素防線金鑽鐵三角歸位，玩轉光明球場上演「鵲」捕「貓」！今晚英超東北打吡紐卡素作客新特蘭，「喜鵲」幾經辛苦捱過傷兵潮，門神告魯爾、兩大中堅史提芬泰萊同哥洛仙尼今戰強勢復出，終於回復最強戰鬥力，對住「黑貓」坐和望贏，要「讓球客勝」！

（有線300及200台周日晚8時30分直播）

紐卡素上季爆冷取得英超第5位，前鋒黑雙煞丹巴巴亞同柏比斯施斯有幾叻仔唔使多講，大家唔好忘記佢哋仲有後防金鑽鐵三角，荷蘭門神告魯爾愈踢愈穩，近排睇見後備龍夏柏老態盡現落地激慢，堅眼冤，更覺告魯爾好重要。至於一對中堅史提芬泰萊及哥洛仙尼大熟大勇，夾慣夾熟，唔使見到後備中堅組合米克威廉臣同白治，順眼好多。防線三子回歸，班波三線齊人，有條件取得今季首場作客勝仗。
新特蘭患「費查依賴症」

新特蘭喺有料領隊奧尼爾帶領下確實愈執愈好，蘇格蘭射手史提芬費查加盟後瘋狂士哥，被視為超成功收購，今次喺打吡戰主場出擊，莊家開緊平手盤，睇落都幾吸引。但再諗深一層，「黑貓」今季5個聯賽士哥全部由史提芬費查一個入晒，其他進攻球員冇貨交，大軍開季聯賽6戰僅贏1場，勝出率勁低，今次仲有硬淨防中卡達莫停賽，搶截能力減弱，前面火力又麻麻，冇乜贏波本錢！

兩隊級數睇落差距唔大，呢個打吡戰對碰次次都爭持激烈，火藥味濃，上季「黑貓」兩戰都有球員被逐，茅到爆！睇番往績，紐卡素過去15次對新特蘭僅輸1場，今場「讓球客勝」夠穩陣，平手盤撐「喜鵲」！