意甲榜首大戰

猪拉多纳

意甲今晚上演榜首大戰，由祖雲達斯主場硬撼拿玻里！已錄得跨季47場聯賽不敗嘅祖記，除咗實力佔優兼有主場之利，更重要係拿玻里首席射手卡雲尼啱啱踢完世盃外圍賽，周圍飛之餘又受高原氣候影響，返到嚟意甲隨時走樣，客軍仲搵乜去抗衡祖記？一於撐1.55倍主W啦！（中央5台周日凌晨0:00直播）
客軍卡雲尼遊飛機河攰爆

兩軍目前同係7戰不敗得19分，祖記以較佳得失球排榜首。之前傳出有傷嘅祖記門將保方同中場馬治斯奧都趕及復原，基本上以最強陣容出戰。特別係保方，佢喺周中國際賽報稱大腿有傷，冇代表意大利鬥丹麥，就畀人話佢係為咗留力，今鋪先嚟搏命。力奇唔知真定假，但只要保方披甲，祖記大門基本上係無後顧之憂，鋒線又有射手加利亞雷拉倒戈踢爭氣波，實在值得投下信心一票。

拿玻里今季狀態起得唔錯，只可惜係佢哋個首席射手、今季入咗6球嘅卡雲尼，周中啱啱幫烏拉圭作客去到位處海拔3,600米嘅玻利維亞高原踢波，然後再飛咗來回合共超過26,000公里，到星期五先歸隊，體力未必回復得切，點會有好發揮吖？仲有，佢哋位主帥馬沙利日前突然自爆季尾或者唔撈，軍心受損，點捧得落手呀？