祖記主場爆滿拿玻里腳軟

猪拉多纳

本周上演意甲榜首大戰由祖雲達斯主場對拿玻里，兩支球隊於聯賽同樣六捷一和不敗，成績可謂不分上下。但祖雲達斯有主場之利，相信可憑地利之助擊敗對手，主Ｗ可捧。（周日凌晨零時開賽）

據報今場祖雲達斯球場好有機會坐滿41000人，事關門票於當地時間星期三已全數售出，更有望打破意甲門票收入紀錄。以往祖雲達斯於迪爾艾比及都靈奧林匹高球場都冇咁高入座率，今次有大量「粉絲」入場打氣，肯定會提高主隊戰意。賽前傳出祖雲達斯門將保方因傷未必出得，但後備門將史度拉利一樣有經驗，影響唔算太大。
拉素AC大駁火

至於較後時間舉行有拉素主場對AC米蘭，賽前《米蘭體育報》就話今場係AC米蘭教練阿里基終極一戰，為保烏紗今場一定要贏。而陣中三名前鋒包括保贊、柏仙尼及大勇嘅艾沙拉維都會全數打正選，一於當係決賽咁踢。至於拉素方面，一對今季當弗球員高路斯及靴蘭尼斯都話唔放AC米蘭在眼內，一定會把握主場之利狂攻對手。料今場雙方會大駁火，入球大盤可捧。（周日凌晨2時45分開賽）