車仔鍊爆熱刺

猪拉多纳

保亞斯上季畀車路士炒魷，「飛士」盡失，今季把心一橫加盟另一倫敦球會熱刺，今晚首度喺白鹿徑球場倒戈砌「車」，必存復仇之心，在公在私都恨贏波！不過，車仔今季喺英超仲未識寫個輸字，加上近五戰熱刺不敗賽績硬淨，受讓要「讓球客勝」！（有線300及200台周六晚７時45分直播）

保亞斯上季挾莫連奴接班人之名上「車」，一心喺英超舞台大展拳腳，點知領軍未夠一年已經執包袱，主要死因係將帥不和，「車仔」土炮艾殊利高爾及林柏特等人擺明玩嘢逼走保帥，及後眾星發力踩行油，連歐聯都贏埋，有如大巴大巴掌摑保亞斯，認真冇面！保帥壯志未酬，今夏接過夏利列納帥印重返倫敦執教熱刺，明顯有心同舊老細阿布拉莫域打對台。
往績剋死熱刺

不過，車路士今季聯賽７戰６勝１和，曾於倫敦打吡作客搞掂阿仙奴，證明咗打到硬仗o架！車仔隊長泰利因「歧視門事件」要坐四場波監今仗缺陣，但防線中路仲有大衞雷斯拍住加利卡希爾，兩個都有級數頂得住。另外，中場林柏特有傷上陣成疑，不過「林伯」今季已非必然正選，況且巴西中場奧斯卡杜斯山度士近排當弗，中場唔愁冇人用。

熱刺早前作客戰勝曼聯踢出今季代表作，快翼加里夫巴利放乾對手後衞嚇死街坊，但呢招已經揚晒，教頭保亞斯又硬頸死都要打單箭頭，得一個迪科爾唔多夠照喎！睇埋績，熱刺近五次砌「車」錄得３和２負，包括上季喺足總盃四強大敗１比５，今場先揀「讓球客勝」，平手盤撐車仔！