富明尼斯主場執甘

猪拉多纳

周中巴甲焦點大戰，榜首富明尼斯主場硬撼第三位甘美奧，未來幾仗可謂爭標最關鍵時期，富軍踢完今仗後，下輪惡鬥次席明尼路，呢兩場賽事不容有失，必然一鼓作氣爭勝，奠定捧盃基礎。甘美奧已落後11分，球員難免洩氣，戰意唔及對手，受讓亦唔抵玩，簡單直取1.75倍主W。（周四早上6時30分開賽）

富明尼斯下半季愈戰愈勇，近九場聯賽贏咗八場，現時已分別拋離第二位明尼路9分、甘美奧11分。不過，巴甲仲有八輪賽事，富軍仍未可安枕，因為餘下對手唔易啃，除咗連鬥甘美奧及明尼路之外，仲要對前列勁敵聖保羅及華斯高，存在失分危機。如果富軍可以率先解決甘美奧，除咗可保持領先優勢外，亦可為下仗對明尼路壯行色，對能否捧盃非常關鍵，加上主場出擊，富明尼斯對呢三分志在必得。
「小三」甘美奧近況曳

至於甘美奧表面上仍有爭標機會，但其實已非常渺茫，只能盡人事阻延富軍捧盃。事實上，甘美奧狀態亦麻麻，近六場聯賽僅兩勝，而且所贏對手只係踢風流波嘅高士路，以及下游弱隊利斯菲體育會。今仗遇上來勢洶洶嘅富明尼斯，恐怕難以全身而退。