C朗百戰慶典 葡萄牙捉北愛祭旗

猪拉多纳

世盃歐洲區外圍賽F組賽事，啱啱輸咗畀俄羅斯嘅葡萄牙，重返火龍球場出戰北愛爾蘭，葡軍眾星除咗想大炒對手一吐烏氣，更想用大捷嚟幫隊長C朗慶祝今場攞第100頂喼帽，葡萄牙讓到2球，照捧1.81倍「讓球主勝」！

（有線155台周三凌晨3:45直播）
北愛陣容天殘地缺

葡萄牙作客俄羅斯嗰場波礙於對方防守嚴密，而且嗰邊天氣又凍，圍攻不果而輸波，總算非戰之罪。成班球星家陣谷住成肚火，雖然左閘法比奧干查奧同中場魯爾梅利斯今戰肯定缺陣，但葡萄牙質素一流，回師肯定坐爆嘅主場，對住未開齋兼近幾場作客至少淨輸2球嘅北愛爾蘭，依然夠殺有餘。再者，今晚C朗就會拎百頂喼帽嘉許狀，以呢位萬人迷要威到盡嘅性格，肯定會搏命數胡嚟慶祝！

對家北愛自主帥米高奧尼爾舊年12月揸旗後未贏過，狀態勁沉，今戰仲話有守將麥奧尼停賽、杜積安因傷退隊，以往主力包括中場格蘭麥肯、沙恩費格遜及布拉特都因傷冇入選，得番史提芬戴維斯擔起條中場線，邊頂得住如狼似虎嘅葡萄牙呀！

歐洲區 F組