博意大利「讓和」丹麥防線硬淨未必大敗

猪拉多纳

今晚世盃外圍賽歐洲區B組將爆發焦點大戰，由意大利主場迎戰丹麥！主隊中場派路嘅罰球技術好到連美斯都話Like，有「球王偶像」拍住大勇嘅奧斯華度同迪羅斯，「藍衫軍」要小勝硬淨嘅丹麥唔難，小妹冷敲3.25倍「讓和」。

（now635台周三凌晨2:45直播）

阿根廷球王美斯上仗對烏拉圭再入靚罰球，賽後記者梗係追問佢嘅罰球射術點解勁咗咁多啦，美斯就自爆其實係參考派路同朗拿甸奴嚟練習，派路知道咗之後直情覺得「受寵若驚」：「聽到美斯咁講，我真係勁開心！」
美斯自稱跟派路學嘢

其實小妹覺得派路實在太謙喇，美斯幾勁都好，講到射罰球，又點及得上呢位「意國型男」先？派路無論傳球同創造力都係世界頂級，有佢喺度，要控制中場真係話咁易。

意大利雖然豪取兩連勝，但由於只係對馬爾他同阿美尼亞呢啲弱旅，仍然畀意國傳媒插到飛起，領隊柏蘭迪利當然勁唔忿氣啦：「我同班球員喺上場（3:1贏阿美尼亞）之後，都好滿意隊波嘅表現，點知第二日就見到啲報紙亂咁寫！」不過人言可畏，柏帥今場唔交出3連勝嘅話，質疑佢能力嘅聲音肯定愈嚟愈多。好彩柏帥手中除咗派路之外，仲有上仗同派路一樣交出1入球1助攻嘅迪羅斯，同把握力超強嘅奧斯華度，大把本錢開W。
艾格 卡積亞唔係人咁品

之不過，丹麥防線有丹尼爾艾格同卡積亞鎮守，唔係咁易畀你入幾粒，雖然丹麥近5場都贏唔到，但當中只得1場波係輸多過1球，今鋪玩「讓球和」就最啱喇！

歐洲區 B組