狂牛法惡 法國陷谷底有排捱

猪拉多纳

鬥牛勇士卡達朗大爆發！今晚世盃歐洲區外圍賽I組，「鬥牛兵團」西班牙喺主場迎戰「高盧雄雞」法國，隨時發惡大開殺戒。事關除咗主隊實力同狀態都遠勝客軍外，最緊要係今晚個卡達朗球場從來都係「鬥牛兵」福地，歷來9戰共得7勝2和未試過甩拖，2.05倍「讓球主勝」要捧場！

（now632台周三凌晨3:00直播）

近年橫掃球壇嘅西班牙，論實力，全世界根本冇乜邊隊同佢哋有得比，特別係今晚嘅對手法國，以前柏天尼或施丹年代當然巴閉，只係依家陣中想搵個真正獨力孭到飛嘅都冇，名氣大嘅好似列貝利同賓施馬等，唔係話冇質素，但要靠佢哋砌低西班牙？貪心咗啲囉！
拉莫斯冇大礙 小白復任正選

連同上輪作客大炒白俄羅斯4:0，西班牙喺世盃外同歐盃外夾埋累積咗24場連勝，氣勢勁到冇朋友。球隊匯集西甲兩大勢力巴塞同皇馬球星做骨幹，質素、默契同鬥心都係冇得彈。雖然話佢哋前日操練有防守重心沙治奧拉莫斯缺席，只係玩gym算數，不過消息話都係主帥迪保斯基為求穩陣嘅安排，估計臨場拉莫斯都繼續擔正，加埋上場打後備嘅恩尼斯達都會復任正選，最強陣容出擊，有殺冇賠啦！
法國賓施馬勁食白果

喺歐國盃決賽周曾經吞過西班牙兩蛋嘅「高盧雄雞」，褪色勁旅想翻身根本唔易，淨係睇佢哋上周五同日本拍跳都輸波而回，就知新帥迪甘斯似乎仲未搵到帶領球隊走出低谷條路。陣容方面，左閘艾拉同防中卡比耶今仗回歸正選，希望可以頂到多一陣，可惜前線仲要靠今季表現麻麻嘅基奧特同賓施馬，其中賓仔原來唔經唔覺已經連續8場國際賽冇入波，今晚憑乜射得爆皇馬隊友卡斯拿斯個十指關吖！
西班牙外圍賽24連勝

‧西班牙喺世盃外同歐盃外合共取得24連勝。

‧鬥牛兵團喺世盃外累積47場不敗。

‧近3次交手西班牙全勝，入5球失0球。
恩尼斯達養精蓄銳博首球

西班牙實力超班，要贏波話咁易，如果夠狠，既可再買佢1.86倍半場贏，甚至係6.5倍半場2:0波膽都得，事關佢哋近5場波有4場都係半場贏2粒，鬼咁輕鬆。首名入球方面，上次喺歐國盃決賽周，就係靠沙比阿朗素梅開二度，今次佢實畀法國佬睇實，反而恩尼斯達養精蓄銳踢今場，9.5倍值得一博。

歐洲區 I組