三「斯」炸瑞典 德國-1夠鑊氣

猪拉多纳

世界盃外圍賽歐洲區C組，德國主場三「斯」會審瑞典！70後高路斯、80後馬高列奧斯、90後卻奧斯，三個年代進攻球員擦出火花，令「日耳曼戰車」配備當今球壇最強火力攻擊組合，可謂周身炮、支支勁。今仗只要摧毀最大阻礙瑞典，出線前路就一片平坦，以德國一貫拚搏作風，一定全力搶攻，希望盡早奠定勝局。瑞典僅得射手伊巴謙莫域支撐大局，防線無力招架，大敗唔奇，要「讓球主勝」。

（now 633及660周三凌晨2時45分直播）

德國中前場大部分球員只係廿三四歲，但表現非常成熟，活力充沛，往往唔錫力，強攻對手。新星馬高列奧斯有速度、有腳法，似足美斯，好難看管。卻奧斯、奧斯爾等人後上支援亦極具威脅，帶挈老將高路斯有更多空間射門，德國擁有多層次進攻，令對手防不勝防。最佳例子莫過於上仗對愛蘭爾，即使對方主帥查帕東尼擅長防守戰術，但一樣被打得體無完膚，慘敗1比6，凸顯德軍火力之恐怖。

德國今仗回師主場，更加唔會手軟，尤其係對手瑞典屬於同組最大威脅，必先除之而後快，才能消取後顧之憂。「日耳曼戰車」既然最大強項係進攻，自然要盡量發揮長處好好「招呼」客隊。

瑞典近年都係靠伊巴謙莫域打江山，但足球始終係團體運動，唔可以太依賴個人能力。
瑞典難防密集火力

瑞典踢咗兩場外圍賽，對手僅為魚腩哈薩克同法羅群島，但都只係小勝，充滿反映「一人球隊」嘅難處。特別係今場遇上三線皆強嘅德國，估計伊巴謙莫域掂波機會唔會多，更加唔使諗入波。加上後防球員只屬平庸之輩，又點抵擋德國強大火力，淨輸兩球或以上好正路。