全能朗尼主帥甜心

猪拉多纳

尹佩斯加盟曼聯後士哥不斷，令今季聯賽仍未開齋的朗尼為人詬病，在此Peter不得不為佢平反。雖然入波係前鋒展示實力的最佳方法，但經過時間嘅歷練後，朗尼唔再係一名單純的射手，其全面的踢法、閱讀球賽的能力同甘於為球隊犧牲的精神，係隊際運動員的典範。

記得02年朗尼在愛華頓初出道時，一腳射死阿仙奴的世界波驚為天人，然而他場外私生活唔檢點，場內脾氣臭又成日食牌，經常闖禍，若非有名帥費格遜的嚴厲管教，朗尼可能只會停留於「永遠的天才」，難成大器。在費Sir的調教下，朗尼的潛能得以盡情發揮，佢唔單止能左右開弓，頭槌又唔錯，於前場能傳善射，又不惜氣力回防助守，腦筋清晰之餘，仲收晒火添。當年於紅魔的C朗、依家的尹佩斯可以入波當食生菜，甘當綠葉、頻頻助攻的朗尼，實在功不可沒。
新英軍隊長瞻前顧後

呢類Complete attacking team player（最完全的現代進攻球員），雖然唔係最完美，但他們能接受場上不同任務，嚴格執行教練的部署，唔似得有些前鋒過於自我，掛住個人表演入靚波，因此朗尼一定係Darling of the Coach（主帥甜心）。前晚對聖馬力諾之役，朗尼不但擔當英軍隊長，並且梅開二度，瞻前顧後表現光芒四射，如此全面的球員實在世間難求，唔能夠單憑入波數字去評價佢，難怪費Sir對佢寵愛有加。
金句：朗尼：最完全的現代進攻球員