判得就係官 平等對待女裁判

猪拉多纳

所謂巾幗不讓鬚眉，現時外國好多體育項目都有女裁判，唔單止英倫及德國有，就算NBA都有女士擔當執法工作。喺男女平等嘅大前提之下，香港仍有待改善。縱然推廣工作已經做得比以前好，但投身球證行列嘅女士始終唔多。其實香港都有個女球證，暫時只集中為乙、丙及丁組執法，相信假以時日球迷就會喺甲組賽事見到佢。

足球圈向來都以男性為主，但既有女性肯投入圈內，於劣勢之下找到立足之地，Peter覺得佢好夠膽識，亦值得所有人對佢尊重及鼓勵。不過唔係所有球員都識得對球證尊重。Peter見過有低組別球員因不滿意女球證判決，竟蓄意用波省向球證以發洩不滿，行為令人髮指。先莫理球證係男係女，球員喺場內就要尊重球證。要知道球證都係人，總會有錯判嘅時候，但呢點亦係球賽一部分，有幾無奈都要接受。但球員做法欠尊重不特止，更因球證係女性而作出欺凌行為，Peter就更加睇唔過眼。
丙組改制球員變野蠻

以往地區丙組以推廣足運為主，大部分球員都係25歲以下。但自從丙組改制之後，問題就逐漸浮現。Peter知道仍有好多人肯為香港足運出錢又出力，但眼見以往斯文及純技術較量嘅比賽漸漸變質，如今都心灰意冷。老實講，Peter好少就制度發表任何意見，但現時比賽變得粗野，球員及職員對球證欠尊重，Peter覺得改制未必係最適當嘅做法。