FC悉尼做大騷

猪拉多纳

澳職尋日開鑼，焦點賽事反而係今日威靈頓鳳凰主場迎戰FC悉尼！客軍除咗有迪比亞路加盟，仲羅致咗前薩格勒布戴拿模王牌射手洛夫歷克，加埋原有嘅前布力般流浪中場球星艾馬頓，今晚好大機會大演入球騷賀「金童」澳職處子戰，1.85倍入球大值博！

（開賽時間：周六下午2:30）

FC悉尼教頭確克本來擔心迪比亞路體能不足，希望佢留番下星期主場迎戰紐卡素噴射機先處子登場，不過「金童」最終都有隨隊飛往威靈頓，呢位意大利球星日前仲好有信心咁表示自己狀態唔錯，已經預備好喺今場比賽披甲，以佢嘅經驗、傳送同罰球功夫，今日要喺技術水平一般嘅澳職製造入球絕對冇難度，更何況陣中仲有洛夫歷克同艾馬頓，相信入一、兩球只係等閒事！
鳳凰班底穩定夠默契

不過悉尼都唔係穩W，因為威靈頓鳳凰坐擁一班新西蘭國腳，實力同默契唔可以睇少，今季佢哋仲簽入効力過飛燕諾同阿爾克馬爾嘅比利時射手侯斯甘斯加強鋒力。既然雙方鋒力都有番咁上下，一於撐佢地今晚開入球騷，買1.85倍入球大賀「金童」首登澳職！

好久没做猪