車仔撻着撞飛金絲雀

猪拉多纳

現代足球領隊屬「高風險行業」，責任重、壓力大，而且現今老細班主都缺乏耐性，一有乜冬瓜豆腐隨時被炒，不但飯碗不保，更可能名譽掃地。除咗要識調兵遣將、制訂戰術外，教大會仲要識湊班球星大帝。

以前球壇好興「鐵腕教頭」，好似卡比路、查柏東尼咁都係代表，但依家唔興喇，尤其係教富豪球會，陣中球星身嬌肉貴，如果好似管細路咁管佢哋，只會帶來反效果。上季英超保亞斯就係人辦，最終教得車路士半年就執包袱。接手嘅迪馬堤奧，如果講戰術運用，唔會好得過保帥；但佢就勝在同班球星friend，最後連歐聯都攞埋。
林拔追討諾域治200萬鎊

講真踢得巨型班，個個都有卡士，做領隊又使乜再教佢哋踢波？最緊要係同球員好好溝通，等班大帝踢得舒舒服服，完全發揮佢哋所長，已經係成功一大步，而迪帥明顯深明此道，再加上老細阿布拉莫域今夏又肯揼水買高價球星，所以車仔本季有力挑戰各項錦標。目前車路士狀態勇銳，剛於歐聯大勝，回歸英超可保持強勢。今輪對手「金絲雀」諾域治，本身實力已弱，近期仲要畀前領隊林拔以無理解僱為由追討200萬鎊，可謂屋漏兼逢夜雨，今場捧車路士「讓球主勝」。

（有線300及200台周六晚10時直播）