南美內訌Round2插森巴兵 撐阿根廷

猪拉多纳

阿根廷同巴西聽朝喺「美洲超級經典大戰」再決高下，首回合巴西係就係贏2:1，但對住阿根廷B隊都踢得鬼咁辛苦，今鋪輪到阿根廷主場有望報仇，平手盤博得過！

（中央5台周四早上9:00直播）

「美洲超級經典大戰」同歐洲聯賽撞晒期，雙方僅派南美本土兵出戰，論牌面當然係擁有尼馬、李安度達美奧同盧卡斯洛迪古斯嘅巴西秤先，之不過佢哋喺首回合只係驚險反勝阿根廷2:1，扳平球仲有越位之嫌，老實講阿根廷真係輸得幾唔抵。

次回合喺阿根廷東北部城市雷西斯滕西亞開戰，阿根廷領隊沙貝拉今次徵召咗伊拿斯奧史高高入伍，呢位27歲射手新季阿甲9戰已經勁入6球，帶挈所屬嘅紐維爾舊生以不敗戰績排榜首，由佢夥拍剛啱喺巴甲梅開二度嘅彭美拉斯射手巴高斯，火力絕對唔使懷疑，而且沙貝拉早就度定下半場由「532」改打「4312」，靠尾段發力𡁻巴西，樣樣都計好晒數嘞。
巴西球迷拒絕隨軍

仲有，盛傳巴西領隊文奴文尼斯帥位危危乎，首回合已經有唔少球迷喺看台叫佢辭職，有球迷組織仲話唔會隨隊，直至文奴文尼斯下台為止，今戰造訪阿根廷少咗批擁躉打氣，前鋒路爾斯法比安奴又因為肌肉受傷倦勤，淨係氣勢都輸成條街啦！

首回合：阿客負1:2